Jólin jólin!

Gleðileg jól kæru heimasíðugestir nær og fjær! Hafið það sem allra best yfir hátíðirnar.

Kallinn er líka kominn í jólafrí!

Loksins er ég kominn í jólafrí! Erfitt að sitja heima og vinna í verkefninu á meðan Dísa litla lá uppi í sófa og gerði bókstaflega ekki neitt! Segi svona....hún var dugleg að þjóna mér; bakaði, gerði jólahreingerninguna, þvoði fatadruslurnar mínar og strauaði allt í skápunum. En í morgun skilaði ég verkefni og fékk ég mjög góð ummæli fyrir það. Ég eyddi reyndar alltof miklum tíma í það. Arndís var að verða vitlaus undir lokin af því að ég var búinn að vera í mínum eigin draumaheimi í 2 vikur og var varla viðræðuhæfur á kvöldin við matarborðið. Það sem gerði útslagið var þegar ég sat 40 klst fyrir framan tölvuskjáinn án þess að fara að sofa.....ég þurfti bara aaaaaðeins að klára smá áður en plakatið fór í prentun.

Verkefnið hét "Et Pitstop" og áttum við að byggja litla viðbyggingu (parasite) við gamla byggingu sem er staðsett í iðnaðarhverfinu á Nordhavn (í austurhluta Kaupmannahafnar). Við máttum sjálf ráða því hvað litla viðbyggingin innihéldi og ákvað ég að búa til lítið kaffihús úr gámum. Já, hljómar ekkert voðalega spennandi að búa til kaffihús úr gámum en þetta vakti mikla lukku hjá kennurum og nemendum. Ég vildi nefnilega tengja bygginguna aðeins við grámyglulega iðnaðinn í kring svo ég ákvað að notfæra mér gámana sem eru út um allt á þessu hafnar-/iðnaðarsvæði. EN gámar eru fyrirtaks byggingarefni að mínu mati....þeir eru mjög "vistvænir" ef tekið er tillit til þess að verið sé að endurnýta þá. Í staðinn fyrir að liggja tómir og ryðga þá er hægt að nota þá í eitthvað nýtt og betra. Ódýrir, sterkir og endast lengi! Var að setja inn nokkrar myndir af verkefninu á myndasíðuna okkar (lykilorðið er skammstöfunin á gamla menntaskólanum okkar með litlum stöfum).

Við fljúgum til Íslands á morgun og lendum síðdegis. Auðvitað reiknum við með rauðum dregli , fallegum jólasnjó og limmósínu í bæinn. Sættum okkur ekki við neitt minna. En næsta færsla verður skrifuð HEIMA. Hlökkum til að sjá ykkur!

Grétar Örn


Á fóninum: Driving Home For Christmas - Chris Rhea

Jólafrí!

Jæja þá er ég komin í jólafrí! :) Kláraði prófin í fyrradag, gekk nú bara alvega ágætlega. Voðalega skrýtið að vera komin í frí og þurfa ekki að líta í bók næstu 7 vikurnar! Ég veit ekkert hvað ég á að gera af mér, finnst ég vera að svíkjast undan.

Í gær var "Julefrokost" hjá deildinni minni í skólanum, áður en þangað var haldið hittumst við nokkur heima hjá okkur og höfðum það huggulegt með jólaglögg, piparkökur og fleira góðgæti og hlustuðum á jólalög. Þetta var nú hreint út sagt ömurlegasti Julefrokost sem ég hef farið á! Þurftum að borga 200 DKK fyrir kvöldið það eina sem við fengum fyrir þennan pening var mjög takmarkað magn af vondum mat! Stemningin var frekar misheppnuð, nefndin sem skipulagði kvöldið voru búin að búa til V.I.P svæði fyrir þau sjálf þar sem engum öðrum var leyft að koma....frekar halló! Við Svíarnir ákváðum því að yfirgefa staðinn upp úr hálf 11 og settumst niður á kaffihús. Það var þó greinilegt að við vorum ekki búin að jafna okkur eftir lítinn svefn síðustu vikurnar þannig við fórum öll heim um hálf tólf leytið.

Svíarnir mínir, fínir og sætir á leið á Julefrokost!

Það er þó búið að plana næstu viku nokkuð vel, svo það er ekki hægt að segja að maður sitji auðum höndum! Vinna, skemmta sér, út að borða, ferð til Malmö (kannski), pakka fyrir Íslandsför og ég veit ekki hvað og hvað.

Grétar er á fullu í skólanum, hann á að skila verkefni á föstudaginn eftir viku. Ég hef nú minnstar áhyggjur af honum, hann rúllar þessum verkefnum upp eins og alltaf.

Hlakka til að sjá ykkur öll eftir rétt rúmlega viku!

Kv. Arndís

Sumir komnir í jólafrí.......

Ég sit sveittur heima að vinna með gámana mína á meðan Arndís er að dúlla sér með vinkonum sínum í Fields. Þær kláruðu prófin í gær og eru að gera sér góðan dag! Í kvöld er svo julefrokost hjá deildinni þeirra svo það verður örugglega svaka fjör á þeim fram eftir nóttu.

Lítill fugl hvíslaði að mér að það væri von á nýrri færslu frá henni á morgun. Ég vildi bara henda inn þessari fallegu mynd sem við tókum frá svölunum okkar í gær af því að ég var orðinn pínulítið þreyttur á að sjá alltaf sömu myndina á blogginu.

Ørnen